Isinusulong sa Senado ang panukalang batas na magbibigay ng 20 porsiyentong diskuwento sa load at internet para sa mga estudyante, lalo na sa mga panahong napipilitang lumipat sa online classes dahil sa masamang panahon.
Sa ilalim ng Senate Bill No. 2275 o Student Load Discount Act na inihain ni Senator Erwin Tulfo, chairman ng Senate Committee on Social Justice, Welfare and Rural Development, layunin nitong mabawasan ang gastusin ng mga mag-aaral para makasabay sa alternative modes of learning.
Saklaw ng panukala ang mga Pilipinong naka-enroll sa elementarya, sekondarya, technical-vocational at higher education institutions, maliban sa post-graduate studies. Magagamit umano ang diskuwento buong taon, kabilang ang weekends at holidays.
Kailangan lamang ipakita ng mga estudyante ang valid school ID o proof of enrollment at birth certificate. Sa oras na maisabatas, obligadong ipatupad ng mga telecommunications company ang diskuwento sa mga kwalipikadong serbisyo, habang may kaukulang parusa sa mga hindi susunod.
