4 katao nasawi matapos araruhin ng cement mixer

Apat ang nasawi, kabilang ang tatlong batang naglalakad lamang sa gilid ng kalsada, matapos mawalan ng preno ang isang cement mixer truck sa Bansalan, Davao del Sur.

Ayon sa pahinante ng sasakyan, bumibiyahe sila sa Barangay Managa nang biglang mawalan ng preno ang truck.

Lumihis ito pakaliwa at bumangga sa hindi pantay na bahagi ng kalsada, na agad ikinamatay ng mismong driver.

Dahil sa impact, tinamaan din ng cement mixer ang tatlong batang edad siyam, 10, at 12.

Ibinahagi ng pahinante na bago pa sila bumiyahe ay nasabi na niya sa driver na may problema ang preno ng sasakyan.

Patuloy pang iniimbestigahan ng mga awtoridad ang insidente.