Limang matataas na opisyal ng Department of Public Works and Highways (DPWH) ang binalasa ni Secretary Manuel Bonoan para sa pagpapatibay ng transparency at mas maayos na serbisyo publiko.
Batay sa magkakahiwalay na Special Orders na may petsang Agosto 28, 2025, apektado ng balasahan si Engr. Vivian Biaco na itinalaga bilang OIC-District Engineer ng Catanduanes District Engineering Office (DEO) kapalit ni Engr. Simon Arias; Inilipat din si Engr. Leonardo Gonzales bilang Assistant District Engineer ng Albay 2nd DEO, kapalit ni Engr. Joanne Morales;
Si Engr. Joanne Morales naman ay inilipat bilang OIC-Assistant District Engineer ng Albay 3rd DEO, kapalit ni Engr. Gonzales.
Samantala, si Engr. Editha Babaran ay itinalagang OIC-Regional Director ng DPWH Region IV-B, kapalit ni Engr. Gerald Pacanan na inilipat ng puwesto; itinalaga naman si Engr. Ronalyn Ubiña bilang OIC-Assistant Regional Director ng DPWH Region II, kapalit ni Engr. Editha Babaran.
Ayon sa DPWH, regular na organizational adjustments ang mga galawang ito alinsunod sa kapangyarihan ng Kalihim sa ilalim ng Executive Order No. 124 (1987).
Dagdag pa ng ahensiya, layunin ng reassignments na matiyak ang tuloy-tuloy, patas, at epektibong implementasyon ng mga proyekto sa iba’t ibang rehiyon.
