TUGUEGARAO CITY-Sinamapahan ng kasong kidnapping at serious illegal detention ang isang construction worker dahil sa pagdukot umano sa 12 years old na lalaki sa Santa Ana,Cagayan.
Sinabi ni Police Lt. Rolando Jacobe ng PNP Aparri,isinakay umano ng suspek na si Jun Dave Ravilaz,20, ang bata noong gabi ng June 24,2019 sa kanyang bisikleta.
Dinala ng lalaki ang bata sa Lallo at sa Buguey gamit ang bisikleta.
Binalak umanong ibenta ng lalaki ang bisikleta sa Buguey subalit nang walang bumili nito ay iniwan na lamang sa isang kaibigan.
Dahil dito, naglakad ang dalawa papuntang Aparri kung saan dito na sila nakita ng mga kaanak ng bata na agad na ipinahuli ang suspek.
Sinabi ni Jacobe na sinabi ng lalaki na kusang sumama sa kanya ang bata.
Sinabi naman umano ng bata na tuwing binabalak niyang takasan ang suspek ay hinahawakan siya ng mahigpit sa kanyang balikat.
Idinagdag pa ng bata na tinuturuan umano siya ng suspek na mang-hold-up.
Gayonman, hindi naman umano sinaktan ng suspek ang bata.
