TUGUEGARAO CITY – Umay ta 60 bettors anna gambling operators y naresto ta nassinna nga anti-illegal gambling operation ta Cagayan.
Insigida gapa nga dinayaw ni P/Chief Supt. Eliseo Rasco, Regional Director na Police Regional Office No.2 (PRO-02) y pulis ira nga narraid ta bolahan na jueteng ta Tuguegaro City, anna ta ili na Enrile, Peñablanca, Lallo anna Lasam.
Namwan nga y Meridien Vista Gaming Corp. nga tammi na negosyante nga si Atong Ang ay awan tu prankisa na nga mappasugal ta nakagi nga ili anna syudad nga mawak y operasyon laman ta unak na Cagayan Economic Zone Authority (CEZA) ta ili na Sta. Ana.
Olu taw ay nagafu na otoridad si Edwin Articulo nga mappataya ta jueteng ta Barangay Catayaoan ta Lal-lo nga netuldu na y tadday nga SUV nga iyusa da ta abbolan na jueteng nu anni annam nga tolay y naresto.
Ta mattunuk nga riad ay maturu nga P30,000 nga jueteng money y nakumfiska anna jueteng paraphernalia.
Makasowan ta anti-gambling law y naresto nga tolay kanu ni Ang.
Olu gapa ngana nga nakimemallo si PCSO Chairman Jose Jorge Corpuz ta local officials na Cagayan nga balinan da na y operasyon na Meridien nga kuwan da laman nga Jueteng front.
