TUGUEGARAO CITY- Makalawa ta pinansiya nga uffun nga maggafu ta Employees Compensation Commission o ECC megafu ta Government Service Insurance System o GSIS y pulis ira nga natay ta kabalin nga makillaban da ta suspek nga serbiyan da ta warrant of arrest ta Brgy. Lubnac, Lubuagan, Kalinga.
Kinagi ta Bombo Radyo ni Remedios Andrada na ECC Region 2 nga nebon na dakallan da nga i-assess y familya na natay nga pulis ira para ta iddan da nga uffun kannira.
Base kanni Andrada, makalawa ta burial benefits nga mabbalor ta P20,000 y kada familya na natay nga pulis fera ta kada vulan nga pension na atawa anna ana da nga ari malammpas ta 21 anyos.
Nenawak na ECC nga nakadepende ta contribution ta GSIS na natay nga pulis y pension na naulila nga beneficiaries.
Fera ta natay nga pulis, iddanan da gapa tu kuwartu y nabigaran ira nga pulis.
Matageno nga natay ira da PO3 Crizaldo Lawagan, PO2 Jovenal Aguinaldo, PO1 Charles Compas anna PO1 Vincent Paul Tay-od nga parehu nga miembro na Kalinga Provincial Public Safety Company ta kabalin nga makillaban kannira y tadday nga high value target na pulisya nga si Willy Sagasag turi Pebrero 21 turi iservi da y warrant of arrest ta Brgy. Lubnac, Lubuagan.
Nabigaran gapa da S/Insp. Edward Liclic, PO1 Ferdinand Asuncion, anna PO1 Ferdie Liwag.
Napatay gapa na pulis y top most wanted person nga si Sagasag nga makagi nga lider na robbery gang anna ituldu da nga suspek ta pag-ambush nga nepatay na tallu nga pulis turi 2002.
Olu taw binista ni PNP Chief Ronald Dela Rosa y napatay ira nga pulis nu anni siniguro gapa y benepisyo da yaw.
