Nagpahayag ng pag-aalala ang ilang bansa sa Gulf matapos banggitin ni US President Donald Trump ang posibilidad na targetin ang water treatment at desalination plants sa Iran sa gitna ng umiinit na tensiyon sa rehiyon.
Ayon sa mga eksperto, ang pag-atake sa mga pasilidad na nagbibigay ng tubig sa sibilyan ay ipinagbabawal sa ilalim ng international law at maaaring ituring na war crime. Mahalaga ang mga desalination plant sa mga bansa sa Gulf dahil dito nanggagaling ang malaking bahagi ng kanilang inuming tubig.
Nagbabala ang mga opisyal na maaaring gumanti ang Iran sa pamamagitan ng pag-atake rin sa katulad na imprastraktura sa mga karatig-bansa, na posibleng magdulot ng malawakang krisis sa tubig at seguridad.
Bagama’t pribadong ipinapaabot ng ilang kaalyado ang kanilang pagtutol, iniiwasan nilang hayagang kontrahin ang Estados Unidos habang nagpapatuloy ang negosasyon sa pagitan ng US at Iran.
Iginiit naman ng US military at White House na susunod sila sa batas at target lamang ang mga legal na layunin sa kanilang operasyon.
