Unti-unti nang lumalayo sa Batanes ang Bagyong Rosal habang patuloy na humihina, ayon sa pinakahuling ulat ng Weather Bureau alas-kuwatro ng madaling araw.
Namataan ang sentro ng bagyo sa layong 275 kilometro silangan-hilagang-silangan ng Itbayat, Batanes, taglay ang lakas ng hanging aabot sa 155 kilometro kada oras at pagbugsong hanggang 190 kilometro kada oras.
Kumikilos ang bagyo pa-hilagang-kanluran sa bilis na 15 kilometro kada oras.
Inaasahan pa rin ang katamtaman hanggang malakas na pag-ulan sa Batanes, habang nakataas ang Tropical Cyclone Wind Signal No. 2 sa Batanes at hilagang-silangang bahagi ng Babuyan Islands.
Nasa Signal No. 1 naman ang nalalabing bahagi ng Babuyan Islands, mainland Cagayan, hilagang-silangang bahagi ng Isabela, Ilocos Norte at Apayao.
Posible ring makaranas ng maulap na kalangitan, kalat-kalat na pag-ulan at pabugsu-bugsong hangin sa malaking bahagi ng Luzon at Visayas dahil sa panlabas na sirkulasyon ng bagyo at trough nito.
Gayunman, inaasahang unti-unting hihina ang epekto ng bagyo sa Extreme Northern Luzon habang patuloy itong kumikilos palayo sa bansa.
Pinapayuhan pa rin ang publiko, lalo na ang mga residente sa mga lugar na nakataas ang wind signal, na manatiling mapagmatyag at sumunod sa mga abiso ng mga lokal na awtoridad.
