Iniimbestigahan ng Department of Health (DOH) ang sanhi ng pagkamatay ng 2-taong-gulang na batang babae sa Palimbang, Sultan Kudarat, isang araw matapos siyang mabakunahan ng Measles-Rubella vaccine.
Ayon kay DOH spokesperson Undersecretary Albert Domingo, kasalukuyang isinasagawa ng regional, provincial, at municipal epidemiology units ang masusing pagsusuri upang matukoy ang pangyayari. Wala pa ring tiyak na sanhi ng kamatayan sa ngayon.
Sinabi ng ina ng bata na isang health worker ang nagbigay ng bakuna sa Barangay Milbuk, at bandang isang oras pagkatapos nito ay nagsimula ang bata sa pagsusuka, pagtatae, panghihina, at pamumutla ng katawan at kuko.
Inihayag ng pamilya na pinaghihinalaan nila ang bakuna bilang sanhi ng pagkamatay.
Nagbigay ang DOH ng suporta sa pamilya, kabilang ang mental health at psychosocial services, at nanawagan sa publiko na umiwas sa pagpapakalat ng maling impormasyon.
Iginiit ng ahensya na ligtas at epektibo ang Measles-Rubella vaccine, na ginagamit na sa buong mundo mula pa noong 1960s upang protektahan ang mga bata laban sa malubhang sakit at kamatayan.
