Inihayag ng Bureau of Corrections (BuCor) na pinalalakas nito ang faith-based rehabilitation programs bilang bahagi ng pagpapabuti ng kalagayan ng mga persons deprived of liberty (PDLs). Layunin nitong tulungan ang mga bilanggo na magbago sa pamamagitan ng espiritwal na paglago at positibong paghubog ng kanilang pagkatao.
Ibinahagi ni Director General Gregorio Pio Catapang Jr. ang mga natuklasan sa isang international conference sa New Zealand, kung saan lumabas na mas malaki ang pag-unlad ng mga bilanggong sumasailalim sa faith-based programs kumpara sa mga hindi nakikilahok.
Ayon sa BuCor, ang mga bilanggong may aktibong pakikilahok sa relihiyon ay nagkakaroon ng pagbabago sa asal at mas nagiging maayos ang pakikitungo sa kapwa, kabilang ang pagbaba ng agresibong pag-uugali sa loob ng kulungan.
Dagdag pa ng ahensya, nakatutulong ang mga programang ito sa pagpapalaganap ng empatiya, pagpapatawad, at pananagutan, na nagreresulta sa mas ligtas at maayos na kapaligiran para sa rehabilitasyon at muling pagsasama sa lipunan.
