Inaasahan ng Civil Aviation Authority of the Philippines (CAAP) na tataas ang bilang ng mga pasahero sa mga paliparan ngayong Holy Week kahit tumataas ang presyo ng langis.
Tinatayang aabot sa 10% ang pagtaas ng pasahero, o humigit-kumulang 550,000 na biyahero, kumpara sa 500,000 na naitala noong nakaraang taon.
Ayon sa CAAP, isa sa mga dahilan ng pagtaas ay ang mga tiket na na-book bago pa man tumaas ang tensiyon sa Gitnang Silangan, na nakaapekto sa suplay ng krudo at presyo ng langis. Karamihan sa mga magta-travel ngayong Holy Week ay nakapagpareserba na ng kanilang flights buwan bago ang pagtaas ng presyo ng langis.
Bilang bahagi ng pagtugon sa epekto ng pagtaas ng presyo ng langis, inihayag ng CAAP ang pagbawas sa aeronautical fees at Passenger Service Charges (PSC).
Binawasan ng 50% ang aeronautical fees, habang ang landing charges ay pinarating ng hanggang P5,000. Ang bagong PSC rates ay ang sumusunod: international mula P900 pababa sa P700; domestic mula P350 pababa sa P150–200; Principal Class 1 mula P300 pababa sa P150–200; Principal Class 2 mula P200 pababa sa P100; at community airports mula P100 pababa sa P50.
Samantala, itinaas naman ang fuel surcharges sa Level 8 mula Abril 1 hanggang 15, na aabot sa higit P6,000 para sa international flights.
Sa kabila ng pagtaas ng presyo ng langis, tiniyak ng Philippine Airlines at Cebu Pacific na sapat ang kanilang jet fuel upang masustento ang operasyon sa susunod na tatlong buwan.
