Nagpatupad ang Canada ng retaliatory tariffs sa mga produktong mula sa United States na nagkakahalaga ng halos $20 bilyon, kasabay ng pag-anunsyo ng financial assistance para sa mga negosyo at manggagawang apektado ng tumitinding trade war.
Magsisimula sa Setyembre 8 ang counter-tariffs na ipapataw sa nasa 700 produkto mula US, na may mga taripa na 15%, 25% at 50%.
Kabilang sa mga produktong may 50% tariff ang ilang bakal, aluminum, furniture at damit. Samantala, 25% naman ang ipapataw sa ilang keso, appliances at seafood, habang 15% sa electronics at tools.
Naglaan din ang Canadian government ng C$7.5 bilyon na bagong at pinalawak na financial support para sa maliliit at katamtamang negosyo, cash flow ng mga kompanya at mga manggagawang posibleng maapektuhan ng bagong taripa.
Ang hakbang ng Canada ay tugon sa bagong 50% tariffs ng administrasyong Trump sa $20 bilyong halaga ng Canadian imports matapos mabigo ang negosasyon ng dalawang bansa.
Itinuturing itong panibagong paglala sa relasyon ng Canada at United States, habang kapwa nagpapatupad ang dalawang bansa ng mga hakbang bilang proteksyon sa kanilang mga negosyo at manggagawa.
