Dalawang mambabatas mula sa Hilagang Luzon ang hinihinalang nasa likod ng isang malawakang ilegal na operasyon ng paggawa at bentahan ng sigarilyo na nagkakahalaga umano ng ₱4.5 bilyon, ayon kay Interior and Local Government Secretary Juanito Victor “Jonvic” Remulla nitong Huwebes.
Ang pahayag ay ginawa kasunod ng pagsalakay ng mga awtoridad sa isang ilegal na pabrika ng sigarilyo sa Barangay Panipuan, Mexico, Pampanga, kung saan anim na Chinese national ang inaresto at 60 Pilipino ang nailigtas.
Ayon kay Remulla, ang pabrika ay nag-operate nang walang kaukulang lisensya at permit sa buong buwan ng Enero 2026 at nakagawa ng tinatayang ₱4.5 bilyong halaga ng sigarilyo.
Sinabi rin ng kalihim na nagsimula ang operasyon noong Enero 1, 2026, habang naitayo na ang mga makina noong Disyembre bago pa dumating ang mga dayuhang manggagawa.
Kinilala ng Department of the Interior and Local Government (DILG) ang mga Pilipinong manggagawa bilang mga biktima ng human trafficking. Ayon sa ahensya, pinilit silang magtrabaho nang walang sahod at sa ilalim ng hindi makataong kalagayan.
Dagdag pa ni Remulla, ang mga kasong may kaugnayan sa human trafficking at paglabag sa Anti-Agricultural Sabotage Act ay mga non-bailable offense.
Ayon sa DILG, ang mga incorporator ng warehouse ay binubuo ng tatlong Pilipino at dalawang Korean national. Kinumpirma naman ng Philippine National Police–Criminal Investigation and Detection Group (PNP-CIDG) na nagsilbi na sila ng subpoena sa isa sa mga Pilipinong incorporator.
Sinabi ni CIDG Director Police Major General Robert Morico II na may pagkakatulad ang mga pekeng sigarilyong nasamsam sa Pampanga sa mga nakumpiska sa Balete, Batangas noong Disyembre 31, 2025, at sa Malabon noong Enero 1, 2026.
Ayon kay Remulla, umaabot sa mahigit ₱30 bilyon ang nawawala sa gobyerno taun-taon dahil sa ilegal na kalakalan ng tabako—pondo na sana’y mapupunta sa serbisyong pangkalusugan ng bansa.
Patuloy pa ang imbestigasyon ng mga awtoridad upang matukoy ang buong lawak ng operasyon at ang pagkakakilanlan ng mga sangkot.
