Nagpahayag ng pangamba ang ilang senador sa malaking bilang ng mga opisyal ng Gabinete na itinalaga lamang sa “acting” na kapasidad, na hindi dumaraan sa pagsusuri at kumpirmasyon ng Commission on Appointments (CA).
Sinimulan ni Senator Rodante Marcoleta ang usapin sa pamamagitan ng isang privileged speech sa plenary session. Ayon sa kanya, ilang mahahalagang ahensiya ng gobyerno ang pinamumunuan ng mga acting secretary na may kontrol sa bilyon-bilyong pondo at mahahalagang proyekto, ngunit hindi pa nasasailalim sa confirmation ng CA.
Kabilang sa mga binanggit na ahensiya ang Office of the Executive Secretary, Department of Finance, Department of Public Works and Highways, Department of Justice, Department of Budget and Management, Department of Environment and Natural Resources, Department of Transportation, at Presidential Communications Office.
Bagama’t sinabi ni Marcoleta na walang ilegal sa pagkakaroon ng acting secretary, babala niya na nagiging delikado ito kapag ang pagiging acting ay nagiging permanente. Aniya, humihina ang constitutional safeguard kapag umaasa ang ehekutibo sa mga pansamantalang appointment.
Sang-ayon si Senate President Pro Tempore Panfilo Lacson at sinabing naiparating na niya ang usapin sa ilang opisyal ng ehekutibo. Samantala, binigyang-diin ni Senate President Vicente Sotto III na may mga limitasyon ang kapangyarihan ng isang acting secretary, lalo na sa pag-apruba ng pondo at pagtatalaga ng mga opisyal.
Isinangguni ng Senado ang talakayan sa Senate Blue Ribbon Committee at Senate Committee on Constitutional Amendments para sa pagdinig.
