Ipinagbawal ng impeachment court sa mga senador-hukom at mga abogado ng prosekusyon at depensa ang pampublikong pagtalakay sa merito ng impeachment case laban kay Vice President Sara Duterte, alinsunod sa Rule 18 ng impeachment rules.
Sa pagdinig, muling tumestigo si OVP Assistant Secretary Lemuel Ortonio ngunit inamin niyang wala siyang personal na kaalaman kung paano ginastos ang P500 milyong confidential funds. Sinabi niyang umasa lamang siya sa impormasyon mula kina dating VPSPG chief Colonel Raymund Lachica at dating OVP special disbursing officer Gina Acosta.
Kinuwestiyon ito ni Senator-Judge Raffy Tulfo, na nagsabing hindi makatwiran na hindi alamin ni Ortonio kung paano ginamit ang pampublikong pondo. Samantala, hiniling ni Senator-Judge Erwin Tulfo na iharap si Lachica bilang testigo upang malinawan ang mga usapin sa confidential funds.
Inanunsyo rin ng prosekusyon na tatawagin nitong testigo sa susunod na linggo si defense counsel Michael Poa, na dating DepEd undersecretary. Tatanungin siya kaugnay ng pag-disburse ng P112.5 milyong confidential funds ng DepEd noong panahon ni Duterte bilang Education secretary.
Bago matapos ang pagdinig, pinaalalahanan din ni Presiding Officer Francis “Chiz” Escudero ang depensa na ipaalala kay Duterte ang pagsunod sa sub judice rule.
