Naglabas ang Department of Labor and Employment (DOLE) ng opisyal na pamantayan sa pasahod para sa limang araw na idineklarang special non-working at regular holidays sa Disyembre 2025. Ang mga alituntuning ito ay nakasaad sa Labor Advisory No. 17, Series of 2025, bilang pagsunod sa Proclamation No. 727.
Sakop ng advisory ang tatlong special non-working days — Disyembre 8 (Feast of the Immaculate Conception of Mary), Disyembre 24 (Christmas Eve), at Disyembre 31 (huling araw ng taon) — at dalawang regular holidays — Disyembre 25 (Araw ng Pasko) at Disyembre 30 (Araw ni Rizal).
Pay rules para sa special non-working days (Dec. 8, 24, 31)
- Ipatutupad ang “no work, no pay.” Hindi ito saklaw kung may company policy o CBA na nagbibigay ng special pay.
- Kapag pumasok sa special day, may karagdagang 30% ng basic wage para sa unang walong oras.
- Kung lalagpas sa walong oras, may dagdag pang 30% ng hourly rate para sa overtime.
- Kung ang special day ay tumapat sa rest day at may pasok, may dagdag na 50% ng basic wage para sa unang walong oras.
- Sa overtime sa special day na tumapat sa rest day, may karagdagang 30% ng hourly rate.
Pay rules para sa regular holidays (Dec. 25 at 30)
- May 100% holiday pay ang empleyadong pumasok o naka-leave with pay sa araw bago ang holiday.
- Kung ang araw bago ang holiday ay non-working o rest day, kailangan lamang na pumasok o naka-leave with pay sa huling working day bago nito upang makakuha ng holiday pay.
- Kapag pumasok sa regular holiday, doble ang bayad para sa unang walong oras.
- Sa overtime, may dagdag na 30% ng hourly rate.
- Kung regular holiday na tumapat sa rest day at nag-overtime, may dagdag pang 30% sa overtime basis.
Nagpaalala rin ang DOLE na ang 13th-month pay para sa mga empleyado sa pribadong sektor ay dapat maibigay hindi lalampas ng Disyembre 24, 2025, at hindi dapat mas mababa sa 1/12 ng kabuuang basic salary na natanggap sa loob ng isang taon.
