Opisyal nang kinumpirma ni gambling tycoon Atong Ang ang kanilang relasyon ni actress Sunshine Cruz kasunod ng video ng halikan nila sa isang sabungan.
Matatandaan na naging viral sa social media nitong nakalipas na linggo ang video ni Ang at Cruz na naghalikan sa cockpit arena.
Sa unang video, makikita ang aktres na naglakad at lumapit kay Ang at hinalikan niya ito.
Sa ikalawang video, na kinunan sa ibang araw pero sa parehong lugar, makikita naman si Ang na lumapit kay Cruz at hinalikan sa bibig, at walang pakialam sa mga taong nakakakita.
Si Cruz ay dating anim na taon na karelasyon ng pulitiko na si Macky Mathay bago ang kanilang paghihiwalay noong September 2022, matapos na mapagtanto umano ng aktres na hindi gumagana ang kanilang relasyon.
Dati rin siyang kasal kay actor Cesar Montano bago ang annulment ng kanilang kasal noong 2018.
Kasalukuyan ang co-parenting ng dalawa sa tatlo nilang mga anak na mga babae.
Samantala, dating iniugnay si Ang kay actress Gretchen Barretto matapos na makita silang dalawa sa ilang events, subalit iginiit ng aktres na business partners lamang sila.
Noong 2019, sinabi ni Ang na masaya siya sa kanyang asawa na si Iris sa gitna ng mga tsismis na mayroon siyang relasyon kay Barretto, maging sa kanyang kapatid na si Claudine, at sa kanyang pamangkin na si Nicole.
