Nanawagan si Apayao Governor Eleanor Bulut-Begtang sa publiko kontra diskriminasyon sa pasyenteng nagpositibo sa COVID-19 at pamilya o kamag-anak nito kaugnay sa kauna-unahang kumpirmadong kaso ng virus sa lalawigan.
Sa kanyang mensahe, nanawagan ang gubernador ng pang-unawa at malasakit sa isat isa at pagdarasal para sa mabilis na paggaling ng mga pasyente ng COVID-19.
Nanawagan din si Begtang ng kooperasyon ng publiko sa isinasagawang contact tracing ng local health authorities sa mga nakasalamuha ng 28-anyos na buntis na duktor at unang kumpirmadong kaso ng COVID-19 sa bayan ng Conner.
Ipinaalala rin ni Begtang na sumunod sa mga health protocols o mga alituntuning pang-kalusugan ng Department of Health (DOH).
Matatandaan na una nang sinabi ni Dr Glenn Mathew Baggao, medical center chief ng Cagayan Valley Medical Center na asymptomatic o walang pinakikitang sintomas sa sakit ang pasyente na nasa maayos na kundisyon.
Bagamat nasa pangangalaga ng CVMC ang pasyente, nilinaw ni Dr. Baggao na ito ay kabilang sa datos ng Cordillera Administrative Region (CAR).
