Magkakaroon pa ng pagpupulong ang bawat rehiyon sa buong bansa kaugnay sa distribusyon ng bakuna kontra African Swine Fever na bibilhin sa bansang Vietnam.
Itoy kasunod ng inaasahang pagdating ng inisyal na 150K doses ng VAC ASF Vaccine mula Vietnam sa 3rd quarter ng taon mula sa 600K doses na target bilhin ng Department of Agriculture.
Ayon kay Regional Technical Director for Operations and Extensions Roberto Busania, isinasapinal pa ang mga guidelines para sa kontroladong roll-out ng mga ASF vaccines sa susunod na buwan.
Pagtiyak aniya ito na magiging maayos ang initial rollout ng bakuna kung saan gagawing per cluster ang bakunahan para mapabilis ang rollout.
Sinabi ni Busania na prayoridad mabigyan ng ASF vaccine ang mga commercial, semi-commercial at clustered barangay na hog raisers.
Isasailalim naman sa limang buwang monitoring ang bakuna at kapag maganda ang resulta, posibleng payagan na ito sa commercial use.
Kumpiyansa naman si Busania na inaasahang makakatulong ang bakuna para mapigilan ang pagkalat ng virus at mapanumbalik ang sigla ng pagbababuyan sa rehiyon at sa buong bansa.
Sa ngayon kasi ay bumaba sa 9.9 milyon ang hog population sa Cagayan Valley dahil sa pagtama ng ASF mula sa dating 12.7 milyon.
Mababatid na una nang naglaan ng P350M ang DA para pondohan ang pagbili ng bakuna, mga syringe, at iba pang pangangailangan para sa ASF vaccine rollout.
