Nagpasabog ang Israel ng target malapit sa Tehran nitong Martes, sa kabila ng matinding babala mula kay US President Donald Trump na tumigil sa airstrikes matapos umanong pumayag ang dalawang panig sa isang ceasefire.
Galit na kinastigo ni Trump ang parehong Iran at Israel sa paglabag sa napagkasunduang tigil-putukan, ngunit lalo niyang pinuna ang kaalyado nitong Israel dahil sa matinding saklaw ng kanilang opensiba.
Ayon sa kanya, inutusan niya ang Israel na itigil ang mga airstrike upang mapanatili ang kasunduan.
Gayunpaman, ilang oras matapos ang anunsyo ng ceasefire, dalawang malalakas na pagsabog ang narinig sa Tehran, ayon sa mga saksi.
Kinumpirma ng tanggapan ni Israeli Prime Minister Benjamin Netanyahu na binomba nila ang isang radar site sa Tehran bilang tugon sa mga missile na umano’y pinakawalan ng Iran tatlong oras matapos ang dapat na pagsisimula ng tigil-putukan.
Mariin namang itinanggi ng Iran na sila ang unang lumabag, at sinabing nagpatuloy pa rin ang pag-atake ng Israel mahigit isang oras matapos ang takdang oras ng ceasefire.
Ipinahayag naman ni Iranian President Masoud Pezeshkian na handa silang bumalik sa negosasyon kung hindi na muling lalabag ang Israel.
