Inihayag ni US President Donald Trump at ng gobyerno ng Pakistan na nakatakdang lagdaan ngayong Linggo ang paunang kasunduan upang wakasan ang digmaan sa Gitnang Silangan, bagama’t sinabi ng Iran na hindi pa tiyak ang agarang paglagda nito.
Ayon kay Prime Minister Shehbaz Sharif ng Pakistan, nagkasundo na ang magkabilang panig sa balangkas ng isang kasunduang pangkapayapaan at naghahanda na para sa elektronikong paglagda bago sundan ng mga teknikal na pag-uusap sa susunod na linggo.
Sinabi ni Pangulong Trump na muling bubuksan sa lahat ng sasakyang pandagat ang Strait of Hormuz kasunod ng paglagda ng kasunduan.
Gayunman, sinabi ni Tagapagsalita ng Iranian Foreign Ministry Esmaeil Baghaei na hindi pa magaganap ang paglagda sa Linggo, bagama’t posible itong maisakatuparan sa mga susunod na araw.
Kabilang sa mga nakapaloob sa panukalang kasunduan ang muling pagbubukas ng Strait of Hormuz, pagluwag ng ilang parusa ng Estados Unidos laban sa Iran, at pagpapalaya sa bilyun-bilyong dolyar na nakapirming ari-arian ng Iran kapalit ng pagbabalik ng malayang paglalayag sa mahalagang rutang pandagat.
Kasunod nito, inaasahang sisimulan ang hiwalay na negosasyon hinggil sa programang nukleyar ng Iran.
Samantala, nilinaw ni Punong Ministro Benjamin Netanyahu ng Israel na hindi magiging bahagi ang kanyang bansa sa nasabing memorandum of understanding at iginiit na pananatilihin ng Israel ang kakayahang tumugon sa anumang banta sa seguridad nito.
Patuloy naman ang mga kilos-protesta sa Iran habang nananatiling hati ang opinyon ng publiko kaugnay ng planong kasunduan.
