Nakatawid sa Strait of Hormuz ang isang liquefied natural gas (LNG) tanker na pagmamay-ari ng Japan, ayon sa pahayag ng co-owner nitong Mitsui O.S.K. Lines noong Biyernes.
Ito ang kauna-unahang barkong may kaugnayan sa Japan na nakatawid sa naturang ruta mula nang magsimula ang digmaan sa Iran.
Nanatiling ligtas ang mga tripulante ng barkong may bandilang Panama na “SOHAR LNG,” ayon sa tagapagsalita ng Mitsui O.S.K. Lines, ngunit tumanggi itong ibunyag kung kailan ito tumawid sa Strait.
Nauna nang iniulat ng pahayagang Asahi ang pagtawid na ito.
Partikular na umaasa ang Japan sa rutang ito, dahil humigit-kumulang 90% ng kanilang inaangkat na langis at 6% ng kanilang LNG ay dumaraan sa Strait.
Hanggang kahapon, 45 barko na pagmamay-ari o pinapatakbo ng mga kumpanyang Hapones ang na-stranded dahil hindi sila makatawid sa Strait, ayon sa transport ministry ng Japan.
Kabilang dito ang 12 tanker ng krudo, 12 tanker na may kargang refined o chemical products, siyam na car carrier, at anim na LNG tanker, ayon sa ulat ng broadcaster na TBS.
Noong nakaraang buwan, sinabi ng Mitsui O.S.K. Lines na ang isa nilang barko ay nakaranas ng bahagyang pinsala sa rehiyon.
Hindi pa matukoy ang sanhi at walang nasaktan.
Noong Huwebes, isang container ship na pagmamay-ari ng French shipping group na CMA CGM ang nakatawid din sa Strait, ayon sa vessel tracking data.
May mga barkong Tsino, mga gas tanker na may bandilang India, at isang crude tanker na pinapatakbo ng mga Griyego ang nakatawid na rin sa Strait mula nang magsimula ang digmaan sa Iran.
