Hiniling ni Akbayan Partylist Representative Dadah Kiram Ismula sa pamahalaan na madaliin ang pagbibigay ng nararapat na tulong sa mga biktima ng paglubog ng MV Trisha Kerstin 3 sa karagatang sakop ng Basilan kung saan 18 na ang naitatalang nasawi at 10 pa ang nawawala.
Mungkahi ni Ismula, palakasin ang rescue teams sa Isabela City at pag-ibayuhin ang medical at psychological support sa 317 survivors.
Hiling din ni Rep. Kiram, na dapat nang gumulong ang proseso ng pagpapanagot sa Aleson Shipping Lines na may-ari ng lumubog na Ro-Ro upang mabigyan ng hustisya ang mga biktima.
Nalaman kasi ni Ismula na ito rin ang kompanyang may-ari ng Lady Mary Joy 3 na nasunog noong 2023 habang naglalayag kung saan 31 ang nasawi.
Bunsod nito ay pinagpapaliwanag ni Ismula ang Department of Transportation (DOT) kung paanong ito ay nakalusot sa safety standards.
Ayon kay Ismula, hindi maaaring hayaang magpatuloy ang ganitong sistema kung saan buhay ng mahihirap nating kababayan ang laging nakataya.
