Naglabas si Pangulong Ferdinand “Bongbong” Marcos Jr. ng Executive Order No. 100 na nag-aatas sa Department of Agriculture (DA) na magtakda ng floor price para sa palay upang maprotektahan ang mga magsasaka laban sa mababang farmgate prices.
Layunin ng kautusan na matiyak na makakakuha ng patas na kita ang mga magsasaka habang nananatiling abot-kaya ang presyo ng bigas para sa mga mamimili.
Sa ilalim ng EO 100, inutusan ang DA na regular na suriin at iakma ang floor price base sa gastos sa produksyon, kondisyon ng merkado, at kapakanan ng mga magsasaka.
Bubuuin din ang isang Steering Committee na binubuo ng iba’t ibang ahensya ng pamahalaan tulad ng DILG, DTI, DAR, DSWD, at NFA upang tumulong sa pagpapatupad at pagsubaybay ng patakaran.
Kasama rin sa kautusan ang pahintulot sa mga ahensya ng gobyerno at mga lokal na pamahalaan na gamitin ang mga pampublikong pasilidad tulad ng covered courts at multipurpose halls bilang pansamantalang imbakan ng palay kung walang magagamit na bodega.
Ang sinumang bibili ng palay sa halagang mas mababa sa itinakdang floor price ay maaaring patawan ng kaukulang administratibong parusa.
Nilalayon ng hakbang na ito na mapatatag ang presyo ng palay, maiwasan ang pagkalugi ng mga magsasaka, at mapanatili ang seguridad sa pagkain ng bansa, lalo na sa panahon ng anihan kung kailan bumababa ang presyo dahil sa labis na suplay at hindi patas na kalakalan.
