Ipinatawag ni Pangulong Ferdinand Marcos Jr. si Chinese Ambassador Jing Quan kasunod ng panibagong tensyon sa Ayungin Shoal na may kinalaman sa usaping pambansang seguridad. Ayon kay Palace Press Officer Undersecretary Claire Castro, tinalakay sa pagpupulong ang insidenteng ikinasugat ng isang tauhan ng Philippine Navy matapos umanong hampasin ng kahoy na batuta ng Chinese Coast Guard.
Ayon sa Armed Forces of the Philippines, nilapitan ng Chinese Coast Guard ang BRP Sierra Madre at marahas na hinarang ang mga tauhan ng Navy habang nagsasagawa ng operasyon sa Ayungin Shoal. Nanawagan ang AFP sa China na itigil ang anila’y iligal, mapang-abuso at mapanlinlang na mga kilos sa West Philippine Sea. Sinabi rin ng Department of National Defense na bahagi ito ng paulit-ulit na mapanuksong aksyon ng China laban sa Pilipinas.
Kinondena ni Pangulong Marcos ang insidente, habang itinanggi naman ng Beijing ang pananagutan at sinisi ang panig ng Pilipinas sa nangyari. Kasabay nito, umani rin ng batikos ang isang AI-generated cartoon ng state-run China Daily na naglalarawan sa mga Pilipino bilang unggoy na kontrolado umano ng Estados Unidos at Japan, na tinawag ng mga opisyal na racist at mapanlait.
