Tumungo na sa India si Pangulong Ferdinand “Bongbong” Marcos Jr. para dumalo sa 18th BRICS Summit sa New Delhi ngayong Setyembre 12 hanggang 13.
Inimbitahan si Marcos ni Indian Prime Minister Narendra Modi at kakatawan siya sa ASEAN sa summit bilang chair ng regional organization ngayong 2026.
Ayon sa Pangulo, ilalahad niya sa BRICS members ang mga prayoridad ng ASEAN, kabilang ang kapayapaan at seguridad, inclusive growth, disaster preparedness, climate action at mapayapang pagresolba ng mga alitan alinsunod sa international law.
Makikipagpulong din si Marcos kay Modi para talakayin ang progreso ng Philippines-India Strategic Partnership, kabilang ang defense at maritime cooperation, trade and investment, health, digital cooperation, turismo at direct air connectivity.
Nakatakda rin niyang muling imbitahan si Modi na bumisita sa Pilipinas para sa ASEAN-India Summit at East Asia Summit sa Nobyembre.
