Nagtala ng panibagong kasaysayan si Argentine football star na Lionel Messi matapos niyang maitala ang kanyang ika-17 goal sa FIFA World Cup sa laban ng Argentina kontra Austria sa Arlington, Texas noong Lunes.
Sa kanyang goal sa ika-38 minuto ng unang half, nalampasan ni Messi ang dating rekord na kapwa hawak niya at ng German striker na si Miroslav Klose na tig-16 World Cup goals.
Naitala ni Messi ang makasaysayang goal matapos ang isang first-touch left-footed strike mula sa loob ng 18-yard box, mula sa assist ni Facundo Medina.
Ang 38-anyos na si Messi, na magdiriwang ng kanyang ika-39 kaarawan sa Miyerkules, ay kabilang sa unang dalawang manlalarong nakapaglaro sa anim na World Cup kasama si Cristiano Ronaldo.
Bago ang torneo, tatlong goal ang kulang ni Messi upang maabot ang rekord ni Klose. Naitabla niya ito matapos makapagtala ng unang World Cup hat trick sa kanyang karera laban sa Algeria noong Hunyo 16.
Muntik na sanang mas maagang mabasag ni Messi ang rekord nang mabigyan ng penalty kick ang Argentina sa ika-9 na minuto matapos matisod si Lautaro Martinez sa loob ng kahon. Gayunman, sumablay ang kanyang penalty kick matapos itong lumampas sa kanang poste.
