May karampatang dagdag na sahod ang mga papasok ngayong araw na ito, Black Saturday, ayon sa Department of Labor and Employment (DOLE)
Ang petsang ito ay itinuturing na special non-working day sa ilalim ng Proclamation No. 1006, series of 2025, at ang mga alituntunin sa sahod ay nakasaad sa Labor Advisory No. 05, s. of 2026.
Ang empleyadong magtatrabaho ng hindi bababa sa 8 oras sa araw na ito ay dapat tumanggap ng 30% dagdag sa kanilang basic na sahod, o katumbas ng 130% ng regular na sahod.
Ang overtime work sa araw na ito ay may karagdagang 30% ng hourly rate, na ibabatay sa pinalaking holiday rate.
Kung ang holiday ay tumapat sa rest day ng empleyado, ang sahod ay magiging 150% ng basic wage para sa unang 8 oras ng trabaho.
Ang trabaho na lalampas sa 8 oras sa rest day holiday ay may dagdag pang 30% ng hourly rate, bukod sa 150% base pay.
Ang mga empleyadong hindi papasok sa araw na ito ay karaniwang walang sahod, alinsunod sa prinsipyong “no work, no pay.”
Sa madaling salita, mas mataas ang sahod para sa mga papasok sa Black Saturday, lalo na kung ito ay tumapat sa kanilang rest day o kung sila ay mag-overtime.
