Kinondena ng Press Photographers of the Philippines (PPP) ang umano’y pangha-harass ng mga pulis sa beteranong photojournalists na sina Bullit Marquez at Rene Dilan habang nagko-cover ng anti-ASEAN rally sa Pasay City noong kahapon. Nanawagan ang grupo sa Philippine National Police (PNP) na imbestigahan ang insidente at panagutin ang mga sangkot.
Ayon sa Photojournalists’ Center of the Philippines (PCP), tinangkang arestuhin at posasan si Marquez habang kinukunan ang pag-aresto sa isang nagpoprotesta, dahilan upang masira ang kanyang kamera. Nagpahayag din ng pagkabahala ang National Union of Journalists of the Philippines (NUJP), habang kinondena rin ng Presidential Task Force on Media Security (PTFOMS) ang insidente at nakikipag-ugnayan na sa mga mamamahayag. Hihiling din ng National Press Club (NPC) ng dayalogo sa PNP.
Samantala, sinabi ng Southern Police District (SPD) na ipinatutupad lamang ng mga pulis ang security protocols at iniimbestigahan na ang insidente. Tiniyak din ng National Police Commission (NAPOLCOM), sa pamamagitan ni Commissioner Rafael Calinisan, na pananagutin ang sinumang mapatutunayang lumabag sa batas at umiiral na mga patakaran.
