Isang Chinese tanker mula sa Estados Unidos ang nakadaan sa Strait of Hormuz nitong Martes sa kabila ng ipinatupad na blockade ng US sa nasabing chokepoint, ayon sa shipping data.
Ang tanker na Rich Starry ang kauna-unahang nakalusot sa kipot at nakalabas ng Gulf mula nang magsimula ang blockade, batay sa datos mula sa LSEG, MarineTraffic at Kpler.
Ang naturang barko at ang may-ari nitong Shanghai Xuanrun Shipping Co Ltd ay pinatawan ng parusa ng Estados Unidos dahil sa pakikipagtransaksyon sa Iran.
Ang Rich Starry ay isang medium-range tanker na may kargang humigit-kumulang 250,000 bariles ng methanol. Ikinarga nito ang naturang produkto sa huling pinanggalingan nitong pantalan sa Hamriyah sa United Arab Emirates.
Ayon sa datos, pagmamay-ari ng mga Tsino ang tanker at pawang Chinese din ang crew na sakay nito.
Samantala, isa pang tanker na may parusa mula sa US, ang Murlikishan, ay pumasok din sa Strait of Hormuz noong Martes. Inaasahang magkakarga ito ng fuel oil sa Iraq sa Abril 16. Ang barko, na dati nang tinawag na MKA, ay nakapagdala na rin ng langis mula sa Russia at Iran.
