Kinondena ng mga opisyal ng Israel, Estados Unidos, at mga lider ng Simbahang Katolika ang umano’y paglapastangan ng isang sundalong Israeli sa isang krus sa southern Lebanon.
Lumabas sa social media ang larawan kung saan makikitang hinahampas ng isang miyembro ng Israel Defense Forces ang isang rebulto ni Hesus na nasa krus gamit ang mapurol na bahagi ng palakol. Ibinahagi ito ng Palestinian journalist na si Younis Tirawi, na kilala rin sa paglalabas ng mga imahe ng umano’y misconduct ng mga sundalong Israeli.
Kinumpirma na ang insidente ay naganap sa nayon ng Debel, isa sa mga lugar sa southern Lebanon na nanatiling tinitirhan ng mga Kristiyano sa kabila ng nagpapatuloy na operasyon militar ng Israel laban sa Hezbollah na sinusuportahan ng Iran.
Ayon sa Assembly of Catholic Ordinaries of the Holy Land, ang naturang insidente ay isang malubhang paglapastangan sa pananampalatayang Kristiyano at nagpapakita ng kakulangan sa paggalang sa mga banal na simbolo at dignidad ng iba.
Mariing kinondena ni Israeli Prime Minister Benjamin Netanyahu ang insidente at sinabing labag ito sa mga pagpapahalagang Hudyo. Aniya, papanagutin ang sundalong sangkot.
Nagpahayag din ng pagkondena si US Ambassador to Israel Mike Huckabee at nanawagan ng agarang at mabigat na parusa.
Humingi naman ng paumanhin si Israeli Foreign Minister Gideon Saar sa mga Kristiyanong naapektuhan, at tinawag na kahiya-hiya ang ginawa ng sundalo.
Sinabi ng Israeli military na iniimbestigahan na ang insidente at binigyang-diin na ang naturang aksyon ay hindi naaayon sa kanilang mga pamantayan. Nangako rin silang tutulong sa pagpapanumbalik ng nasirang rebulto.
Samantala, nananatiling tensyonado ang sitwasyon sa southern Lebanon kung saan nagpapatuloy ang presensya ng mga puwersang Israeli sa ilang lugar kahit may umiiral na ceasefire na pinamagitan ng Estados Unidos upang ihinto ang labanan sa pagitan ng Israel at Hezbollah.
Patuloy ring nahaharap sa iba’t ibang krisis ang mga residente ng Debel, kabilang ang limitadong galaw at access sa ilang bahagi ng kanilang komunidad.
