Tinitingnan ng Philippine National Police o PNP ang pera bilang posibleng motibo sa pagpatay sa isang babae na natagpuan ang bangkay sa loob ng refrigerator sa isang apartment sa Rodriguez, Rizal.
Ayon kay PNP spokesperson Police Colonel Allen Rae Co, sinabi ng ama ng biktima na may malaking halaga umano itong dalang pera.
Gayunman, nilinaw ng pulisya na hindi pa kumpirmado ang motibo at patuloy pa itong bineberipika sa imbestigasyon.
Nangupahan ang biktima at ang kanyang lalaking partner sa apartment noong Setyembre 9. Natagpuan ang bangkay noong Setyembre 16 matapos puntahan ng landlord ang unit dahil ilang araw nang hindi makontak ang mga nakatira rito.
Kinilala ng ama ang biktima at nagpakita ng valid identification documents. Dalawang ID naman na narekober sa lugar ang kalaunan ay natukoy na peke.
Tinutugis ngayon ng pulisya ang lalaking partner ng biktima, na itinuturing na person of interest at may warrant of arrest kaugnay ng kasong serious illegal detention.
Ayon sa pulisya, kapwa naharap sa naturang kaso ang biktima at ang lalaki. Nakapagpiyansa na ang babae habang nananatiling nakatakas ang kanyang partner. Sinusuri rin kung may kaugnayan ang dating kaso sa pagpatay.
Batay sa paunang imbestigasyon, tila sinakal ng lubid ang biktima bago inilagay ang kanyang katawan sa refrigerator.
