Inalis ng House prosecution panel ang tatlo sa apat na artikulo ng impeachment laban kay Vice President Sara Duterte at itinakdang ituon ang kaso sa Article II na tumatalakay sa umano’y hindi maipaliwanag na yaman, hindi buong pagdedeklara ng mga ari-arian at kabiguang bitiwan ang mga interes sa negosyo.
Ayon kay House lead prosecutor at Batangas 2nd District Representative Gerville Luistro, hindi na itutuloy ng prosekusyon ang Article I tungkol sa confidential funds, Article III sa bribery o panunuhol, at Article IV sa umano’y pagbabanta kina Pangulong Ferdinand Marcos Jr., First Lady Liza Araneta Marcos at dating House Speaker Martin Romualdez.
Giit ni Luistro, naniniwala ang prosekusyon na sapat ang mga ebidensiyang naiharap upang bigyang-katwiran ang pagtanggal kay Duterte sa puwesto dahil sa umano’y culpable violation of the Constitution at betrayal of public trust.
Sa pagpapatuloy ng impeachment trial, ang Article II na lamang ang pagtutuunan ng prosekusyon laban sa bise presidente.
