Pinaiigting ng mga awtoridad ang pagbabantay sa seguridad sa pampublikong transportasyon matapos maitala ang pangha-harass ng isang grupo ng mga menor de edad sa loob ng jeepney sa Las Piñas City.
Sa ulat, nakuhanan ng video ang insidente sa Barangay Almazan Uno kung saan tinangkang sumakay ng mga menor de edad sa jeep at umano’y kumuha ng mga gamit mula sa mga pasahero.
Ayon sa pulisya, isa sa mga sangkot ay pinaghihinalaang may dalang ice pick, na sinasabing ginagamit umano dahil may kinakalaban.
Dahil dito, nagsasagawa na ng imbestigasyon ang mga awtoridad upang matukoy ang pagkakakilanlan ng mga sangkot at mapigilan ang posibleng pag-ulit ng ganitong insidente.
Kasabay nito, pinaalalahanan ang mga drayber at pasahero na maging mapagmatyag at agad i-report sa pulisya ang anumang kahina-hinalang kilos, lalo na sa mga pampublikong sasakyan.
Tinututukan din ng pulisya ang aspeto ng child protection at posibleng intervention para sa mga menor de edad na sangkot sa insidente.
