Bukas si Senadora Risa Hontiveros sa posibilidad na tumakbo sa pagkapangulo sa 2028, ngunit gagawin lamang ito kung siya ang mapipiling standard-bearer ng oposisyon.
Sa forum ng Foreign Correspondents Association of the Philippines, binigyang-diin niya na nakasalalay ang desisyon sa mga partido at sektor ng oposisyon, at mahalaga ang pagkakaisa para manalo.
Ayon kay Hontiveros, nagsisimula na silang makipag-usap sa iba’t ibang grupo, ngunit dapat nakabase sa magkakaparehong pagpapahalaga at hindi lamang sa pulitikal na alyansa.
Tungkol sa posibilidad ng pakikipag-alyansa sa kampo ni Pangulong Ferdinand Marcos Jr. sa gitna ng inaasahang pagtakbo ni Bise Presidente Sara Duterte, sinabi niya na kailangan ito ng masusing pag-uusap dahil sa magkaibang paniniwala. Sa ngayon, nakatuon pa siya sa kanyang mga gawain sa Senado.
