Shabu, granada at mga bala, nakuha sa isang bahay sa Lallo, Cagayan

Tuguegarao City- Hinuli ang isang lalaki matapos na makuha sa kanyang bahay ang umano’y shabu, granada at mga bala sa Bagumbayan, Lallo, Cagayan.

Sinabi ni PMAJ Raymund Asistores, hepe ng PNP Lallo, nagsagawa sila ng paghalughog sa bahay ni Elmer Laforga sa bisa ng search warrant.

Aniya, nakuha mula sa mismong bahay at pag-iingat ni Laforga ang 6 na sachet ng hinihinalang shabu, isang granada at tatlong bala ng caliber 45 pistol.

Sinabi pa ni PMAJ Asistores na ang suspek ay kabilang sa listahan ng mga minamanmanang high value target ng PNP at PDEA.

Nabatid pa na ito ay dati ng sumailalim sa Community Based Rehabilitation Program.