Nilinaw ni dating senador Antonio “Sonny” Trillanes IV na siya mismo ang humiling sa House prosecution panel na bawiin ang kanyang pangalan bilang testigo sa impeachment trial ni Vice President Sara Duterte.
Ayon kay Trillanes, ginawa niya ito para maibsan ang pressure na kinakaharap ng prosecution panel kaugnay ng kanyang pagharap bilang witness.
Sinabi rin niyang magsasagawa siya ng press conference sa Biyernes upang ilahad ang mga impormasyong dapat sana ay ihaharap niya sa impeachment trial.
Nauna rito, inanunsyo ni House lead prosecutor Gerville Luistro na hindi na ihaharap ng prosecution si Trillanes bilang testigo, ngunit hindi agad nagbigay ng partikular na dahilan.
Nauna ring tinanggihan ni Senate impeachment court presiding officer Francis “Chiz” Escudero ang kahilingang magpalabas ng subpoena para kay Trillanes.
