Posibleng hindi gawing obligado ng Department of Trade and Industry (DTI) ang trustmark registration para sa mga online seller matapos pag-aralan ang epekto nito sa e-commerce sector.
Ang DTI Trustmark ay isang digital badge na patunay na sumusunod ang isang online seller sa pamantayan ng e-commerce, consumer protection, at data privacy. Maaaring ma-verify ang trustmark sa pamamagitan ng QR code.
Sa kasalukuyan, boluntaryo pa rin ang pagpaparehistro hanggang sa katapusan ng taon, at isinasangguni ng ahensya kung dapat pa itong palawigin.
Bahagi ng pagsusuri ng DTI ay ang pag-alam kung paano naaapektuhan ang mga negosyong sumusunod na sa sistema, lalo na sa harap ng pagdami ng pekeng produkto at ilegal na bentahan online na patuloy na nakakaapekto sa mga mamimili.
Una nang nagpalabas ang DTI ng panuntunan na nagmamandato sa online sellers na magkaroon ng trustmark sa kanilang website o e-commerce page, ngunit pansamantalang ginawang boluntaryo ang pagpapatupad nito.
Marami sa mga maliliit na negosyante ang nagpahayag ng pag-aalala dahil sa dagdag na proseso at gastusin. Bagaman libre ang aplikasyon sa unang taon para sa micro at small enterprises, kailangan magbayad ng P1,130 ang mas malalaking negosyo.
Ang bisa ng trustmark ay aabot ng isang taon.
Inihahanda na ng DTI ang pakikipagpulong sa mga kinatawan ng malalaking e-commerce platform sa susunod na linggo upang talakayin ang mga isyu, kabilang na ang ipinapataw na P5 transaction fee ng ilang online platforms na ipinapasa sa mga mamimili.
