Nilinaw ng Department of Health (DOH) na hindi na kailangang magsumite ng anumang karagdagang dokumento ang mga Pilipino upang makinabang sa ‘Zero Billing’ o ‘No Balance Billing’ policy sa 87 pampublikong ospital na pinapatakbo ng ahensya.
Ayon sa DOH, hindi na kailangan ng interview o anumang proseso dahil awtomatikong miyembro ng PhilHealth ang lahat ng Pilipino sa ilalim ng Universal Health Care Law.
Sakop ng polisiya ang mga pasyenteng ma-aadmit sa basic o ward accommodation, kahit wala silang kakayahang magbayad ng kontribusyon sa PhilHealth.
Tiniyak ng DOH na walang ilalabas na bayarin ang mga pasyente sa ilalim ng nasabing programa sa mga DOH-run hospitals.
Patuloy din ang pagsisikap ng PhilHealth na tiyaking pantay-pantay ang access ng lahat ng Pilipino sa serbisyong medikal.
Sinabi ng DOH na layunin ng Zero Billing na bawasan ang pasanin ng mga pasyente at masigurong may serbisyong medikal ang bawat isa, anuman ang estado sa buhay.
