Hindi muna haharap sa impeachment trial ni Vice President Sara Duterte si dating Department of Education (DepEd) special disbursing officer Edward Fajarda matapos umanong ma-stroke.
Ayon kay Senate impeachment court presiding officer Francis Escudero, nakatanggap ang impeachment court ng liham at medical certificate mula sa abogado ni Fajarda na humihiling na ma-excuse siya sa mga pagdinig mula Agosto 24 hanggang 26.
Sinabi ni Escudero na na-confine sa intensive care unit si Fajarda para sa obserbasyon matapos umanong ma-stroke sa ibabang bahagi ng kanyang utak. Nasa regular room na umano siya ngayon.
Na-subpoena si Fajarda upang tumestigo kaugnay ng Article 1 ng Articles of Impeachment na tumatalakay sa umano’y maling paggamit ng ₱612.5 milyon na confidential funds mula sa OVP at DepEd.
Inatasan naman ni Escudero ang Senate Medical and Dental Bureau na suriin ang kondisyon ni Fajarda at beripikahin ang kanyang medical findings.
Samantala, hiniling ng prosecution panel na maisalang pa rin si Fajarda bilang testigo, na pansamantalang itinakda sa Setyembre 7.
