Naghigpit na ng paghahanda ang mga residente sa ilang bahagi ng Northern Luzon sa papalapit na Super Typhoon Rosal, habang tiniyak ng Malacañang na nakahanda ang mga ahensiya ng pamahalaan sa posibleng epekto ng bagyo.
Sa Batanes, sinamantala ng mga residente ang maayos na panahon upang patibayin ang kanilang mga tahanan. Nilagyan ng mga tabla at pako ang mga bintana, habang itinali naman ang mga bubong upang hindi basta matangay ng malalakas na hangin.
Sa Laoag City, Ilocos Norte, pansamantalang itinigil ng mga mangingisda sa Barangay La Paz ang pangingisda sa dagat dahil sa malalakas na alon. Sa halip, ang ilan ay nangingisda na lamang sa ilog upang may maipangtustos sa kanilang pang-araw-araw na pangangailangan.
Nagpatupad din ng pagbabawal sa paglalayag at pangingisda sa ilang bayan sa Ilocos Norte. Inilipat sa mas mataas na lugar ang mga bangka, habang nakahanda na ang mga rescue equipment at evacuation center sakaling kailanganing lumikas ang mga residente.
Sa bayan ng Adams, nakaranas na ng pag-ulan ang mga residente. Maaga namang inani ng ilang magsasaka ang kanilang mga pananim, kabilang ang lettuce at pipino, upang maiwasan ang posibleng pinsala dulot ng bagyo.
Ayon sa Office of Civil Defense, patuloy ang koordinasyon ng mga rehiyonal na tanggapan nito sa mga lokal na pamahalaan sa Region I at Region II. Nakapuwesto na rin ang mga kinakailangang kagamitan, pagkain at iba pang relief supplies bilang paghahanda sa mga posibleng emergency.
Nagpatupad din ng suspensiyon sa biyahe sa dagat ang Philippine Coast Guard para sa mga sasakyang pandagat na bumibiyahe papunta at palabas ng ilang bahagi ng Catanduanes, kasunod ng pagtaas ng tropical cyclone wind signals sa ilang lugar sa Bicol Region.
Samantala, tiniyak ni Palace Press Officer Claire Castro na nakahanda ang Department of Social Welfare and Development, Department of Public Works and Highways, Department of Environment and Natural Resources at Department of Health na tumugon sa mga pangangailangan ng mga maaapektuhan ng bagyo.
Pinayuhan din niya ang mga residente sa mga lugar na inaasahang makararanas ng malakas na ulan na mag-ipon ng tubig-ulan dahil sa patuloy na epekto ng El Niño.
Umaasa ang Malacañang na makatutulong ang ulan upang maibsan ang epekto ng El Niño, nang hindi magdulot ng malaking pinsala ang bagyo.
Patuloy namang pinapayuhan ang publiko na sundin ang mga abiso ng mga awtoridad, iwasang pumalaot sa mapanganib na karagatan at maging handa sa posibleng paglikas.
