Inaasahang makakaranas ng malakihang bawas-presyo sa produktong petrolyo sa susunod na linggo, kung saan posibleng umabot sa hanggang P11 kada litro ang rollback sa diesel at hanggang P6 kada litro sa gasolina.
Ayon sa industry source, ang inaasahang price adjustment ay nasa sumusunod na hanay:
- Diesel: P9 hanggang P11 kada litro na bawas
- Gasolina: P4 hanggang P6 kada litro na bawas
Mas mataas ito kumpara sa naunang pagtataya ng Department of Energy (DOE), na naglatag ng P8 hanggang P10 rollback para sa diesel at P4 hanggang P5 para sa gasolina. Inaasahan ding bababa ng P9 hanggang P11 kada litro ang presyo ng kerosene.
May isa pang industry estimate na nagsasabing pasok pa rin sa forecast ng DOE ang galaw ng presyo:
- Diesel: P8.85 hanggang P9.90 kada litro na bawas
- Gasolina: P4.03 hanggang P4.88 kada litro na bawas
Ayon sa DOE, nananatiling mataas ang kasalukuyang presyo ng petrolyo sa antas na P70 hanggang P80 kada litro, kumpara sa humigit-kumulang P50 hanggang P60 bago sumiklab ang tensyon sa Gitnang Silangan noong Pebrero 28.
Patuloy namang mino-monitor ang mga pandaigdigang salik na nakaaapekto sa supply at presyo ng langis, kabilang ang mga pag-usad sa usaping diplomatiko sa pagitan ng Estados Unidos at Iran na posibleng makaapekto sa merkado ng krudo.
