Kumita umano ng P2 billion ang isang sindikato na nag-ooperate sa Negros Occidental sa loob ng dalawang buwan, habang hindi nakasingil ang gobyerno ng anumang buwis mula sa ilegal nitong paggawa ng sigarilyo na sinalakay noong Abril 22.
Ayon kay Interior Secretary Jonvic Remulla, ang ilegal na pabrika ng sigarilyo ng sindikato sa Barangay Calumangan, Bago City, Negros Occidental ay gumagawa ng sigarilyong nagkakahalaga ng P250 million kada buwan at tumakbo nang humigit-kumulang walong buwan.
Gumagawa umano sila ng isang kaha ng sigarilyo sa halagang P20 at ibinebenta ito sa P150 nang walang buwis.
Natuklasan ng mga awtoridad na ang mga kontrabandong sigarilyo ay ipinamamahagi sa Southern Luzon, Central Visayas, Western Visayas, at Metro Manila.
Sinabi ni Remulla na ang ilegal na paggawa at pagbebenta ng sigarilyo ay nagdudulot ng bilyun-bilyong pisong kawalan sa buwis ng gobyerno na sana’y inilaan para sa mga serbisyong pangkalusugan.
Dagdag pa niya, ang mababang kalidad ng mga sigarilyo na nakaimbak sa mga pasilidad na pinamumugaran ng daga at ipis ay nagdudulot din ng panganib sa kalusugan ng publiko.
Matatandaan na nagsagawa ng raid ang mga awtoridad sa pasilidad sa Bago at isa pa sa Barangay Singcang-Airport, Bacolod City noong Miyerkules.
Ang pasilidad sa Bacolod ay ginamit bilang imbakan ng mga materyales ng pabrika.
Nasamsam ng mga awtoridad ang mga makinang panggawa ng sigarilyo, hilaw na tabako, mga materyales sa packaging, mga label, at mga natapos na produkto ng sigarilyo na may kabuuang tinatayang halaga na P799.15 milyon, at inaresto ang 10 Chinese nationals.
