Pormal nang kinasuhan ng murder at robbery ng mga awtoridad sa Japan ang isang US Marine kaugnay ng pagkamatay ng isang 39-anyos na babae sa Naha, Okinawa.
Kinilala ang suspek na si Lance Corporal Devin Jacob Ballard, na nakatalaga sa Marine Corps Air Station Futenma sa Okinawa. Ayon sa mga ulat, pinaghihinalaang sinakal nito si Anna Yagi gamit ang kordon ng telepono at ninakaw ang kaniyang backpack na may lamang wallet. Itinanggi naman ni Ballard ang mga paratang.
Nagbunsod ang insidente ng mga protesta sa Okinawa at Tokyo, gayundin ng pagkondena mula sa mga lider ng Japan. Bilang tugon, nagpatupad ng curfew at pagbabawal sa pag-inom ng alak para sa mga sundalong Amerikano na nakatalaga sa Okinawa.
Muling nabuksan ng kaso ang matagal nang pangamba ng ilang residente hinggil sa presensya ng malaking bilang ng mga tropang Amerikano sa Okinawa.
