Inihayag ni U.S. President Donald Trump na kukunin ng Estados Unidos ang pamamahala sa Venezuela kasunod ng umano’y matagumpay na overnight military operation na nagresulta sa pag-aresto kay Venezuelan President Nicolas Maduro at kanyang asawa na si Cilia Flores sa Caracas.
Sa pahayag mula sa Mar-a-Lago sa Florida, sinabi ni Trump na nagsagawa ang U.S. armed forces ng sabayang air, land, at sea assault na mabilis na nagpa-neutralize sa mga puwersang tapat kay Maduro.
Ayon sa kanya, mananatili ang mga tropang Amerikano sa Venezuela hanggang makapagtatag ng bagong gobyerno.
Nanatili umano sa bisa ang embargo ng U.S. sa langis ng Venezuela, at patuloy ang presensya ng American naval forces sa rehiyon. Binalaan din ni Trump ang mga political lider at militar ng Venezuela laban sa anumang paglaban.
Ipinahayag ng pangulo na walang nasawing sundalong Amerikano sa operasyon at nasamsam ng U.S. ang mahahalagang pasilidad ng gobyerno.
Sinabi rin niyang haharap sina Maduro at Flores sa mga kasong narco-terrorism at drug trafficking sa Estados Unidos.
Dagdag ni Trump, plano ng U.S. na isali ang malalaking American oil companies sa muling pagbuhay ng industriya ng langis ng Venezuela bilang bahagi ng transisyon.
Ayon sa kanya, layon ng operasyon na tapusin ang tinawag niyang diktadura at gawing mas ligtas ang Western Hemisphere.
