Binalaan ng World Health Organization (WHO) ang plano ni US President Donald Trump na baguhin ang child vaccination policy sa Estados Unidos, na ayon sa ahensya ay taliwas sa ilang dekada ng siyentipikong ebidensya.
Nilagdaan ni Trump ang isang kautusan na naglalayong muling suriin ang school vaccine mandates at muling isinulong ang paghihiwalay ng MMR vaccine laban sa measles, mumps at rubella.
Ayon kay WHO Director General Tedros Adhanom Ghebreyesus, malinaw ang siyensya na ligtas ang mga bakuna, kabilang ang MMR vaccine, at walang kaugnayan sa autism.
Binigyang-diin ni Tedros na dapat nakabatay sa mahigpit, independiyente at transparent na pagsusuri ng siyentipikong ebidensya ang mga polisiya sa pagbabakuna at hindi sa impluwensiyang pulitikal.
Nagbabala rin siya na ang hindi kinakailangang pagpapaliban o paghihiwalay ng mga dose ng bakuna ay maaaring mag-iwan sa mga bata na hindi protektado laban sa mga sakit.
Ang pahayag ng WHO ay kasunod ng patuloy na measles outbreak sa US, na tinukoy bilang pinakamalubha sa bansa sa nakalipas na 35 taon.
