Pinapayagan ng Department of Education (DepEd) ang pagsususpinde ng face-to-face at online classes kapag umabot sa 42 degrees Celsius o higit pa ang heat index, sa pakikipag-ugnayan sa kinauukulang lokal na pamahalaan.
Ayon kay Education Secretary Sonny Angara, kailangang abisuhan ang mga opisyal ng local government unit (LGU) upang matiyak ang maayos na koordinasyon sa pagpapatupad ng suspensiyon.
Batay sa DepEd Memorandum No. 64, series of 2026, hindi na awtomatikong magpapatupad ng malawakang suspensiyon ng klase sa buong bansa dahil sa matinding init. Sa halip, gagamit ang mga school head ng lokal na pagsusuri batay sa temperatura at halumigmig sa loob ng mga silid-aralan.
Kapag nasa 33 hanggang 41 degrees Celsius ang heat index, sususpindihin ang face-to-face classes at lilipat ang mga mag-aaral sa home-based activities. Kapag umabot naman sa 42 degrees Celsius pataas, ihihinto na rin ang mga gawaing pantahanan.
Layunin ng mga bagong alituntunin na maprotektahan ang kalusugan at kaligtasan ng mga mag-aaral at kawani ng paaralan sa gitna ng inaasahang matinding init dulot ng El Niño.
