Muling hiniling ng mga abogado ni Senador Ronald “Bato” dela Rosa sa Korte Suprema na baligtarin ang naunang pagtanggi nito sa kanilang kahilingan para sa temporary restraining order o TRO na pipigil sa mga awtoridad na arestuhin ang senador.
Sa mosyong inihain nitong Martes, iginiit ni Atty. Israelito Torreon na nagkaroon ng mga bagong pangyayari, kabilang ang pag-anunsyo ng Department of the Interior and Local Government ng ₱50-milyong pabuya para sa ikadarakip ni Dela Rosa.
Ayon sa mga abogado, dahil sa pagbuo ng mga tracker team, insentibo sa pagdakip at direktiba para sa mabilis na pagkilos, posibleng maaresto ang senador bago pa maresolba ng Korte Suprema ang kanilang mosyon para sa muling pagsasaalang-alang.
Iginiit din ng kampo ni Dela Rosa na wala pang korte ang nagpasiya na armado at mapanganib ang senador. Kinuwestiyon din nila ang legal na batayan ng pabuya, at sinabing kailangan ang isang Philippine arrest warrant sa ilalim ng sistema ng pamahalaan sa pagbibigay ng gantimpala.
Noong Mayo 20, 2026, ibinasura ng Korte Suprema ang kahilingan ni Dela Rosa para sa TRO o status quo ante order. Naghain naman ang kaniyang kampo ng mosyon para sa muling pagsasaalang-alang noong Hunyo 1.
Si Dela Rosa ay may umiiral na arrest warrant mula sa International Criminal Court.
