Naghain ang Anti-Money Laundering Council (AMLC) ng tatlong petisyon para sa civil forfeiture laban sa mga ari-arian na umano’y konektado sa isyu ng korapsyon sa flood control projects, matapos ang anim na buwang imbestigasyon at pagpapatupad ng mga freeze order.
Ayon sa AMLC, saklaw ng mga petisyon ang mga ari-arian ng mga indibidwal at entity na nauna nang isinailalim sa freeze orders na inilabas ng Court of Appeals.
Gayunman, hindi pa nila ibinunyag ang mga pangalan at eksaktong halaga ng mga ari-ariang sangkot.
Sa ngayon, naglabas na ang isang korte sa Maynila ng dalawang provisional asset preservation orders upang mapangalagaan ang mga monetary instrument at iba pang ari-arian habang dinidinig pa ang mga kaso.
Batay sa datos ng AMLC, umabot na sa ₱27.8 bilyon ang halaga ng mga ari-ariang na-freeze na may kaugnayan sa umano’y anomalya.
Kabilang dito ang 862 indibidwal at 648 entity, na sumasaklaw sa 7,970 bank accounts, 219 real properties, 253 sasakyan, at 11 aircraft.
Ang pinakahuling freeze orders na inilabas noong Enero ay sumaklaw sa 379 bank accounts, apat na e-wallet accounts, 10 insurance policies, siyam na securities accounts, 10 investment accounts, at 55 real properties.
Samantala, nagbitiw sa kanyang posisyon bilang executive director ng AMLC si Matthew David matapos humiling ng paglilipat sa ibang posisyon sa Bangko Sentral ng Pilipinas.
Pansamantala siyang pinalitan ni Arnold Kabanlit, ang dating deputy director ng ahensya.
Hindi pa malinaw kung ano ang dahilan ng paglipat ni David, na nagsilbi bilang executive director ng AMLC mula pa noong 2022.
