Binigyan ng Civil Aviation Authority of the Philippines (CAAP) ang AirAsia Philippines hanggang Hunyo 6 upang mabayaran ang natitira nitong P270 milyong obligasyong pinansyal sa ahensiya.
Sa isang pahayag nitong Miyerkules, sinabi ng CAAP na nakikipag-ugnayan na ito sa AirAsia hinggil sa usapin mula pa noong nakaraang taon.
Nauna nang nanawagan ang aviation regulator sa low-cost carrier na bayaran ang hindi pa nito naaayos na accounts receivable na umaabot sa P833.66 milyon hanggang Disyembre 31, 2025. Ang halagang ito ay neto na ng mga naunang bayad hanggang Pebrero 13, 2026 at hindi pa kabilang ang mga multa at interes dahil sa pagkaantala ng remittance.
Ayon sa CAAP, kabilang sa mga natitirang obligasyon ng AirAsia ang hindi pa nababayarang air navigation charges, aircraft landing at parking fees, passenger service charges, at hindi pa naire-remit na Domestic Passenger Service Charges (DPSC) mula sa mga nag-expire o hindi nagamit na tiket.
Sinabi ng ahensiya na ang mga DPSC ay pondong hawak ng airline bilang trust fund para sa kapakinabangan ng CAAP at dapat na maipasa sa itinakdang panahon.
Patuloy namang minomonitor ng CAAP ang pagsunod ng AirAsia sa mga obligasyon nito habang hinihintay ang kabuuang pagbayad ng natitirang balanse bago ang itinakdang deadline.
